Dualchas Coimhearsnachd
Tha ceanglaichean làidir aig Seirbheisean Dualchais Innse Gall ris an lìonra de bhuidhnean dualchais coimhearsnachd a tha stèidhichte air feadh nan eilean. Tha iad sin a’ gabhail a-steach Comainn Eachdraidh a tha fo stiùir dhaoine a tha ag obair gu saor-thoileach. Tha toglaichean aig mòran de na comainn, cuid aca a tha nan taighean-tasgaidh, agus faodaidh daoine tadhal orra. Tha tasglainn, fiosrachadh mu shinnsireachd, dealbhan, beul-aithris agus nithean sna cruinneachaidhean aca. Tha na cruinneachaidhean beairteach sin a’ toirt cunntas air na coimhearsnachdan ionadail agus air na cultaran aca, agus a’ cur ris na cruinneachaidhean a tha aig Seirbheisean Dualchais Innse Gall.
Tha buidhnean dualchais eile a’ gabhail a-steach Buidheann Glèidhteachais Còmhdhail nan Eilean Siar, Urras Leabhraichean nan Eilean agus an tasglann didseatach Ceanglaichean Innse Gall.
Chaidh Comann Dualchais Innse Gall, a stèidheachadh ann an 2018, mar buidheann a tha a’ riochdachadh nam buidhnean dualchais coimhearsnachd. Is e na prìomh amasan a tha aige a bhith a’ toirt cothrom do bhuidhnean dualchais bho air feadh nan eilean a bhith a’ co-obrachadh agus a’ cruthachadh tuilleadh chothroman san earrainn. Gheibh sibh tuilleadh fiosrachadh bho’n Oifigear Leasacaidh aca an seo.
Faigh tuilleadh a-mach mu na buidhnean sin agus mu na cruinneachaidhean aca san liosta seo. Bi mothachail, ged a tha Seirbheisean Dualchais Innse Gall a’ dèanamh nas urrainn dhaibh gus am fiosrachadh seo a chumail cho ùr ’s a ghabhas, nach urrainn dhaibh an t-uallach a ghabhail airson dè cho ceart ’s a tha e, agus mar sin tha e air a mholadh fios a chur gu na buidhnean dualchais coimhearsnachd airson an fhiosrachaidh as ùire. Chuireadh sinn fàilte air fiosrachadh sam bith mu leasachaidhean.
